Buelanda watee dijajah Acheh, dijajah deungon rasa sibagoe saboh bangsa nyang meumartabat dan na etika. Jeupang bah that pih saket, tapi hana dalam watee nyang that trep diduek di Acheh.
Akan meutapi indon dipoh ureueng Acheh leupah saket2 dan meusistematik seureuta hana di niet na meubacut pih keu ureueng, hana diniet sibagoe manusia dan dalam watee nyang ka leubeh trep. Chit bit2 peue nyang tom dituleh le Snouck Hurgronje ka di praktek secara beutoi2 le indon.
Deungon peue nyang ka di peulaku le indon nyang ka meuplhoh2 thon nyan, maka ureueng2 Acheh pih ka meuubah dari siuroe keu siuroe, dari nyang got ka jeuet keu hana got. Sampoe2 peukara nyan sabab ka lazen siuroe2 maka ureueng Acheh ka geupike nyan ka jeuet keu normal, chit ka meunan cara meuudep bak geukira.
Bahthat meunan, na chit Rakyat Acheh nyang ka geuthee dan ka geutu'oh seumike nyang bahwa udep diyup indon nyan kon layak jih sibagoe udep nyang normal, malah nyan diluwa nibak normal dan udep hana beutoi. Meunan untok donya, dan meunan chit untok akhirat.
Lam judul artikel nyoe meutuleh "...Gaseh...," nyoe kon meumakna hana rasa beunci bak ureueng Acheh keu indon, nyang pasti bak ureueng Acheh leubeh le that rasa gaseh tabandeng ngon rasa beunci. Bukti jih, meunyo hana rasa gaseh ureueng2 Acheh maka han akan teudong indon nyan, ureueng2 Acheh ka le that go geukeureubeuen droe dan geunerasi geuh deumi gaseh keu indon. Bahthat lheueh nyan meuribee go teuma indon teutap di khianat keu Rakyat Acheh, tapi ureueng Acheh mantong chit teutap na gaseh nyan. Uleh seubab nyan chit ka beutoi judul artikel nyoe nakeuh "...Gaseh..."
Gaseh sidroe2 ureueng beasa jih teuka dari dalam hate, dan geulafaih deungon narit atawa tingkah laku, deungon cara geusaja atawa hana.
Deungon peue nyang ka meutuleh di ateueh, maka derajat gaseh ureueng2 Acheh keu indon nyan jeuet tabagi dalam meupadum boh group, meunurot asoe ate geuh dan kiban nyang geurasa dan geulafaih keu indon nyan. Group2 nyoe nakeuh:
Group Indonesia:
Beasa jih, ureueng2 Acheh nyang mantong geuhei indon nyan sibagoe 'Indonesia', ureueng2 nyoe geukira droe leubeh meupendidekan bahthatpih rame dalam group nyoe hana meuphom idealogi Acheh, hana rasa ke-Achehan atawa jeuet chit takheun memang jaroe gaki indon di Acheh. Paleng kureueng meunyo kon jaroe gaki, pasti na syeedara2 nyang roh keunan.
Ureueng2 nyoe geukira Acheh nyan chit saboh bagian nibak indon, pilehan merdeka hana le atawa hana tom na teupike lam pikeran ureueng2 nyoe.
Mungken saja ureueng2 nyoe hana rayek di Acheh atawa aneuk siblah sapeue, yakni salah sidroe nibak ureueng chik jih nakeuh ureueng Acheh.
Dirumoh beasa jih ureueng2 lam group nyoe hana le meututo basa Acheh, bahthat pih ma ngon du jih mungken chit aseuli ureueng Acheh.
Interaksi siuroe2 ngon ureueng2 nyoe hana jeuoh bida ngon ureueng indon2 beasa. Posting2 bak internet dari ureueng2 group nyoe beasa jih jeuet takheun hana deuh jih nyan ureueng Acheh, peudeuh2 bandira indon nyan ka jeuet takira sibagoe saboh kebanggaan.
Ureueng2 nyoe beasa jih dikira nanggroe indon nyan nyang paleng hayeue lam donya nyoe, sampoe2 hana malee untok dipeutubiet su sang2 teuntra Amerika pih ka teumakot keu teuntra indon, meunan conto.
Group NKRI/RI:
Nyoe peureute group leklap, sigo2 sapeue, sigo saho. Tapeugah meunan lantaran peureute ureueng2 nyoe hana muphom atawa lale deungon peue nyang geupubuet atawa geukheun nyan.
Arti NKRI nakeuh "Negara Kesatuan..." deungon hana seungaja atawa seungaja ureueng2 nyoe ka geupeukong nanggroe indon nyan, watee geukheun 'K, kesatuan' seudangkan ureueng2 Acheh nyang mantong peureulee Acheh mardeka hana peureulee le roh Acheh keunan, jadi hana le 'kesatuan' disinan untok indon. Bah beuhanco dan reule jih.
Ureueng2 lam group nyoe beasa jih geutupeue meubacut sapeue peukara Acheh dan na rasa ke-Achehan meubacut, hana lhok troh lam hate. Ureueng2 nyoe mudah that teupeungaroh dan dumho geutem peuteumon droe geuh peue keuh rot Acheh atawa rot indon.
Ureueng2 lam kelompok nyoe beasa jih kayem seungap meunyo le that tapeugah peukara Acheh, leubeh2 peukara Acheh mardeka. Ureueng nyoe sang2 peureulee dong teungoh dan hana peureulee roh bak buet2 nyang na resiko. Lam pikeran ureueng2 nyoe mantong peureulee Acheh mardeka, tapi indon nyan bek tapeukaru dan adak jeuet bek takheun sapeue chit keu jih deungon alasan watee takheun nyan ka meusalah ngon Islam dan etika udep. Ureueng2 lam group nyoe mantong peudeuh droe got, bahthat pih hana geuthee nanggroe kabeh disampoh le indon.
Meunyo diluwa nanggroe, peureute ureueng2 nyoe hana brat sagai geugrak langkah untok jak peurame acara2 bak duta indon, peurunoe aneuk dan peurumoh untok meunari tradisi Acheh, watee ka 17 Agustus ka troh watee untok jak bak panggong jak hibur duta indon bak acara nyan.
Interaksi lam donya internet dari ureueng2 nyoe beasa jih leubeh le nyang meusipheuet indon, lagee miseue lawak2 indon bagi ureueng2 nyoe mudah that bak geukhem dan bantu untok sipreuek.
Dirumoh, ureueng2 nyoe mantong meututo basa Acheh bahthat pih sigo2 geujampu basa laen deungon telo2 alang, tapi untok komunikasi deungon teumuleh beasa jih geungui basa indon.
Ureueng2 lam group nyoe beasa jih bangga geuh jeuet keu ureueng Acheh, tapi beasa jih peue nyang geubangga nyan leubeh meusipheuet seni, lagu, tarian, hase bumoe, sumbangan Acheh keu indon, keuturunan, dll dalam beuntuk sentimental.
Group indon/Sipa-i:
Rakyat Acheh nyang roh lam hon nyoe beasa jih hana geuniet na le indon nyan, hana le rasa gaseh keu indon meuube seuma. Sep that ka peungalaman meuthon2 ka ditipee le indon, meuseubab nibak nyan ureueng2 nyoe hana peureulee peureumeun sapeue le seulaen Acheh Mardeka.
Ureueng2 nyoe muphom that resiko2 nyang ka geucok deungon geupeuroh droe geuh dalam group nyoe. Identity ureueng2 nyoe hana mudah that teuhah, watee geumeungon le geupileh2.
Salah saboh matlamat udep nakeuh untok kalon Acheh jeuet keu saboh nanggroe nyang mardeka dan meudeelat, teundong keudroe lagee nanggroe2 mardeka nyang laen.
Bak rumoh2 ureueng nyoe beasa jih mantong geumututo basa Acheh, teumuleh lam basa Acheh nyan chit ka jeuet keu peukara beasa. Rap rata teumpat pasti na geulhat bandira Acheh Mardeka.
Interaksi ngon ureueng2 nyoe meunyo lam donya maya leubeh le nyang meusipheuet keu Acheh, posting2 dari ureueng nyoe beasa jih le, atawa karap saban dari peue nyang ka geukheun atawa nyang geutuleh le Almarhum Wali Neugara Hasan diTiro.
Na watee2 meunyo tabaca posting2 dari ureueng nyoe sang geumusu lagee kreueh2 that, leubeh2 meunyo ureueng nyang baca nyan chit hana muphom seujarah Acheh atawa chit bacut sagai 'eleumee lam peukara Acheh. Bagi ureueng nyang ka muphom peue nyang ka dipeulaku le indon keu Acheh, peue nyang geumusu nyan chit ka seupatot jih lagee nyan.
Meudasarar nibak nyang ka teutuleh diateueh, pat kira2 gata tadong jinoe?
No comments:
Post a Comment